15 May Ilir Meta: Do t’i japim fund neglizhencës së jashtëzakonshme për infrastrukturën në Berat
“Demagogjia e Kryeministrit aktual lidhur me sukseset e pafundme me rrugët e asfaltuara anembanë vendit përplaset çdo ditë me një realitet të dhimbshëm për shumë qytetarë kudo në të gjithë vendin”
Kryetari i Lëvizjes Socialiste për Integrim, Ilir Meta, i shoqëruar nga deputeti i LSI-së për Qarkun e Beratit, Nasip Naço, ka zhvilluar një sërë takimesh me banorë të këtij qarku, takime në të cilat janë bërë bashkëbisedime për problemet që shqetësojnë komunitetin atje. Në veçanti z. Meta shprehu shqetësimin në lidhje me gjendjen skandaloze të rrugës Berat-Çorovodë, e mbetur e papërfunduar prej vitesh. Sipas kryetarit të Lëvizjes Socialiste për Integrim demagogjia e Kryeministrit aktual lidhur me sukseset e pafundme me rrugët e asfaltuara anembanë vendit përplaset çdo ditë me një realitet të dhimbshëm për shumë qytetarë kudo në të gjithë vendin. “Unë përmenda vetëm dy ditë më parë gjendjen skandaloze të rrugës nacionale Memaliaj-Tepelenë dhe sot më duhet të them këtu në hyrje të qytetit Çorovodë ku që nga viti 2005 ka ngelur papërfunduar rruga Berat-Çorovodë vetëm për tre kilometra, edhe pse kjo gjë është premtuar vazhdimisht gjatë këtyre tetë viteve nga ana e Partisë Demokratike dhe pse kjo gjë na është premtuar neve çdo vit me rastin e miratimeve të buxhetit të vitit në Kuvend si Grup Parlamentar i Lëvizjes Socialiste për Integrim. Edhe unë personalisht, edhe deputeti i Qarkut të Beratit dhe i Skraparit, z. Naço, kemi ngritur vazhdimisht këtë çështje e cila nuk ka marrë zgjidhje edhe sot pas këtyre 8 vitesh”, u shpreh Kryetari i Lëvizjes Socialiste për Integrim, Ilir Meta.
Z. Meta u zotua se Lëvizja Socialiste për Integrim do t’i japë fund kësaj neglizhencë të jashtëzakonshme. “Ndaj më duhet të them përsëri me bindje të plotë se shiritat elektoralë që pret Kryeministri në largim janë shumë më të gjatë se kilometrat e rrugëve të asfaltuara që pretendohen. Ne jemi të angazhuar për t’i dhënë fund kësaj neglizhencë të jashtëzakonshme që i bëhet një komuniteti të tërë dhe njëkohësisht kësaj pengese madhore për të gjithë vizitorët vendas dhe të huaj për të shijuar bukuritë përrallore të kanioneve të Osumit”, tha ndër të tjera ai.
Lëvizja Socialiste për Integrim ka ngritur gjithmonë shqetësimin në lidhje me gjendjen shumë të keqe të infrastrukturës në Qarkun e Beratit. Lideri LSI-së ka bërë thirrje gjithmonë që vëmendja të jetë më e madhe në këtë qark edhe për faktin se turizmi në Berat po dëmtohet nga mungesa e infrastrukturës. Ndërkohë që deputeti i Lëvizjes Socialiste për Integrim, Nasip Naço, ka kërkuar shpresh interpelanca me ministrin e Punëve Publike, Transportit dhe Telekomunikacionit, z. Sokol Olldashi. Objekti i këtyre interpelancave ka qenë në lidhje me masat e marra për investimin dhe mirëmbajtjen e disa akseve kryesore të lidhur me Qarkun e Beratit, si akset Berat-Lushnjë, Berat-Fier, Berat-Skrapar dhe Skrapar-Përmet. Z. Naço ka bërë thirrje qeverisë që t’i shikojë me prioritet disa akse të rëndësishme rrugore që e lidhin Qarkun e Beratit me pjesën tjetër të Shqipërisë, pasi, sipas tij, janë etike për zhvillimin e kësaj zone, sidomos në fushën e turizmit.