05 Jul Intervista e kryetarit të Lëvizjes Socialiste për Integrim dhënë për emisionin “Nga A në Zh” të televizionit “Agon Channel”
Z. Meta, si e përktheni ju me dy fjalë rezultatin e 23 qershorit? I referohem asaj çka mori Lëvizja Socialiste për Integrim.
Demonstrim i shpirtit të ndryshimit të qytetarëve shqiptarë dhe i shpirtit pro-evropian të tyre. Sepse nuk kanë qenë zgjedhje të lehta, ka pasur një trysni të padrejtë dhe të pandershme nga ana e mazhorancës së mëparshme dhe e qeverisë aktuale për të trysnuar popullin shqiptar, për të deformuar procesin zgjedhor. Gjë që nisi që me ndryshimin e paligjshëm dhe antikushtetues të anëtarit të KQZ-së dhe që vijoi deri në minutën e fundit apo që më pas vazhdoi edhe me një sondazh të proklamuar nga një kompani gjoja që kishte punuar me Obamën, etj., që nxirrte bindshëm fitues koalicionit e djathtë.
Megjithatë, besimi deri në fund të paktën i analistëve ishte ky, që dy koalicionet e mëdha do të ishin shumë afër njëri-tjetrit. Pse ndryshoi kjo gjë më 23 qershor?
Absolutisht, që diferenca ka qenë gjithmonë e ndeshje dhe është thelluar hap pas hapi që nga momenti i shpalljes së koalicionit PS-LSI për arsye se dihet që e majta në Shqipëri gjithmonë ka qenë shumicë. Dhe PD-ja ka arritur të qëndrojë në pushtet për shkak të ndarjes së të majtës në vitin 2005, por edhe në vitin 2009. Natyrisht që në politikë nuk bëhet fjalë për shumica aritmetike dhe dy plus dy nuk bëjnë gjithmonë katër, mund të bëjnë edhe gjashtë, që do të thotë se fryma dhe filozofia që tregohet mund të mbledhë shumë më tepër mbështetës dhe përkrahës se sa votuesit tradicionalë të partive të caktuara dhe natyrisht që kjo ndodhi edhe në këtë rast. Sigurisht që një meritë të veçantë për këtë rezultat ka trysnia e madhe dhe arroganca e mazhorancës së mëparshme në raport me qytetarët. Ishte një trysni e padurueshme për qytetarët dhe një pjesë e mirë e tyre merrnin pjesë në mitingjet e Partisë Demokratike pa dëshirën e tyre, por sa më shumë detyroheshin të merrnin pjesë në mitingje aq më shumë bindeshin që të te kutia e votimit duhet të votonin për opozitën, sepse pas 23 vjetësh kaq shumë politikë në jetën shoqërore, jetën sociale, në jetën familjare, në media ishte bërë një situatë e padurueshme. Dhe natyrisht që erdhi ky mesazh në mënyrë shumë qytetare, shumë të qetë dhe shumë të sigurt përmes votës. Unë asnjëherë nuk kam pasur bindjen që do të ishte një fitore e ngushtë përkundrazi kam pasur bindjen gjithmonë që opozita do të fitonte 80 mandate dhe këtë e kam shprehur që herët…
Dhe kur z. Rama foli për 80 mandate i referohej besimit tek ju, tek ajo që ju kishit kalkuluar së bashku pas marrëveshjes për koalicionin?
Z. Rama kishte sondazhet e tij, unë kisha sondazhet e mia dhe njohjen përkatëse në terren, por gjithmonë kam qenë i bindur dhe e kam deklaruar që në fillim të prillit, që diferenca do të jetë mbi 200 mijë vota mes dy koalicioneve, por ajo vajti akoma më tepër, rreth 300 mijë vota. Gjithmonë kam qenë i bindur që 80 mandatet kanë qenë të padiskutueshme për Aleancën për Shqipërinë Evropiane. Bindja ka qenë e palëkundur qeveria kishte dalë jashtë realitetit dhe përpjekja për të bërë një fushatë pompoze me mitingje pa fund nuk sillte dot atë mesazh për të cilin kishin nevojë njerëzit.
Megjithatë, është shumë pak të mendosh që e gjithë kjo është përmbysur në 2 muaj e gjysmë fushatë…
Jo, unë nuk mendoj se është përmbysur në 2 muaj fushatë, por le të kalojmë në një interpretim tjetër. Marrim rastin e Bashkisë së Tiranës në vitin 2011 në zgjedhjet e 8 majit. Në rast se LSI-ja do të kishte qenë më 8 maj në koalicion me Partinë Socialiste kryetari i Bashkisë do të ishte Edi Rama, veçse do të ishte me gati 46 mijë vota më shumë. Pra, 23 mijë votat hiqi nga mazhoranca e asaj kohe dhe bashkoji me opozitën e asaj kohe. Nuk mendoj se ka ndodhur diçka e jashtëzakonshme, kështu që mendoj se ishte e pritshme kjo gjë dhe ne arritëm si LSI në mënyrë të veçantë të punonim shumë mirë me të rinjtë, me të cilët kemi punuar në mënyrë tradicionale dhe kjo ka dhënë rezultatet e saj. Të punonim shumë mirë me votuesit e rinj, kanë ardhur rreth 200 mijë votues të rinj në këto zgjedhje më shumë se në zgjedhjet e viti 2009. Kemi punuar shumë mirë me emigracionin, sikurse edhe PS-ja ka punuar shumë mirë me emigracionin dhe njëkohësisht i jemi drejtuar jo përkrahësve të vendosur dhe fanatik të partive të tjera. Absolutisht, nuk kemi humbur shumë kohë por i jemi drejtuar atyre të cilët kanë qenë të pavendosur por që janë racionalë, që duan stabilitet që duan normalitet dhe natyrisht që duan zgjidhjen e disa problemeve jetike.
Çfarë përgjigje keni ju z. Meta për ata që thonë se vota për LSI-në në fakt ishte një votë pragmatiste?
Mendoj se ishte një votë e mençur, edhe pragmatiste qoftë, sepse unë nuk e marr asnjëherë në sens negativ, përkundrazi. Ishte një votë e mençur, sepse njerëzit donin një stabilitet dhe së dyti cila ishte ajo parti që do të thoja unë bëri fushatën më pozitive? Ishte LSI-ja.
Ndoshta sepse ishit të detyruar ngaqë ishit në qeveri të paktën deri në 1 prillin e viti 2013?
Jo, nuk ka lidhje me atë, ne kishim shumë arsye për të bërë një fushatë edhe më të fortë, por qëndrimet tona kanë qenë në vijimësi konstruktive, kanë qenë në vijimësi pozitive, kanë qenë në vijimësi, bashkëpunuese. Përpjekjet tona edhe për miratimin e tre ligjeve besoj se janë vlerësuar dhe janë çmuar nga njerëzit, që kjo forcë është një garanci për normalitet në këtë vend. Pra, ky vend ka nevojë që të forcojë stabilitetin, ka nevojë për të bërë edhe ndryshime, pra për të ecur më shpejt. Kështu që mendoj se ky mesazh te LSI-ja u perceptua në mënyrën më racionale si faktor stabiliteti, si faktor bashkëpunimi në vend si faktor normalizimi. Dhe njëkohësisht ne kemi qenë tepër konkretë edhe në programin tonë, nuk jemi marrë me 100 çështje në fushatë, pavarësisht se program kemi pasur për çdo fushë. Kemi kapur problemin e ristrukturimit të ekonomisë për të garantuar rritje të qëndrueshme dhe problemin e punësimit, se si çdo politikë duhet vënë në funksion të rritjes së punësimit në vend.
Nëse biem dakord z. Meta se vota më 23 qershor ndëshkoi Partinë Demokratike për shkak të qeverisjes së keqe, ju kontrollonit 20 % të qeverisjes. Ju ishit pjesë e problemit por nuk ishit qeverisja e keqe? Pse nuk u penalizua LSI dhe nuk mori asnjë faturë nga kjo
qeverisje e keqe e PD-së në total?
Së pari nuk dua t’i ndaj gjërat bardhezi. Së dyti, kjo puna e 20% ka qenë një spekulim i madh, sepse gjërat në të vërtetë nuk kanë qenë kështu. Po kështu ministrat e LSI-së kanë qenë tepër bashkëpunues dhe tepër parimor në qeveri dhe në qeverisje. Kanë qenë tepër konstruktiv, nuk është e vërtetë ajo se ministrat e LSI-së ministritë i kanë pasur si domene të tyre. Kjo është një përrallë. Unë mund t’ju them për shembull, se vetëm në Ministrinë e Ekonomisë, 80 për qind e të gjithë drejtorive në këtë ministri, madje më të rëndësishmet, kanë qenë ose persona që kanë punuar më parë në administratë, përpara se të bëhej koalicioni i vitit 2009, ose kanë qenë kryesisht të propozuar nga ana e Partisë Demokratike. Apo edhe në Ministrinë e Shëndetësisë, dihet që më shumë se gjysmën e këtij sistemi e përfaqësojnë sigurimet shëndetësore dhe shumë struktura të tjera.
Njerëzit kanë qenë tepër racionalë. Së pari, LSI-a nuk ka pasur lidershipin e qeverisë. LSI-a ka treguar përgjegjësitë e saj. LSI-a ka marrë dhe kostot e saj, absolutisht, të cilat diku kanë qenë të drejta por në të shumtën e rasteve kanë qenë të padrejta, sepse ka qenë një interes në atë kohë edhe i Partisë Socialiste më shumë për të goditur përfaqësuesit e LSI-së në media, duke parë të keqen tek aleanca LSI – PD dhe duke e ekzagjeruar shumë raste të sakta dhe të pavërteta por ka qenë dhe interes i segmenteve të Partisë Demokratike për të ekspozuar gjoja njerëz të LSI-së si përfaqësues të fenomeneve kryesore, ndërkohë kur pushteti real ka qenë 99 për qind në duart e Partisë Demokratike. Pra, LSI është sjellë në mënyrë konstruktive edhe në qeverisjen e vendit, në mënyrë modeste. Ka treguar vullnet për të bashkëpunuar dhe për të bërë reforma. Dhe ka bërë një gjë të mirë, që ka bërë vazhdimisht lëvizje në qeveri, gjë që Partia Demokratike nuk e ka bërë. Pra, në drejtim të ministrave, të përfaqësuesve të saj. Sepse edhe ndryshimi është pozitiv.
Megjithatë duket sikur jeni në vështirësi me aleatin kryesor, PS-në për të ndarë postet që do të drejtojë njëra apo tjetra, duke pasur parasysh se ju tashmë jeni me një potencë të shtuar…
Nuk kemi asnjë vështirësi dhe nuk e di se ku e lexoni ju këto vështirësi. Përkundrazi, jemi në një sintoni dhe në harmoni të plotë.
Edhe pse nuk kemi ende një ide të qartë se kush do të drejtojë çfarë…
Kjo është gjëja më e parëndësishme, sepse më e rëndësishme është ndërrimi i programit elektoral në një program qeverisës dhe për këtë gjë po punohet. Dhe së dyti, struktura e qeverisë së ardhshme në përputhje edhe me programin dhe prioritetet e tij, dhe në fund do vijnë emrat që për mua nuk është gjëja më e rëndësishme. Më e rëndësishme është programi dhe ajo që do të realizojë qeveria sepse kjo është ajo që presin qytetarët. Kjo çështja e ministrave, kush është apo kush nuk është, është më shumë çështje kurioziteti sesa çështje thelbësore.
Por me siguri kanë rëndësi potenciale edhe emrat që do të mund të drejtojnë këtë program…
Patjetër, por ajo vjen në fund dhe unë mendoj këto të jenë emra krejtësisht në harmoni me programin dhe me prioritetet e tij.
Për shembull ju keni programin me pesë pika për punësimin. LSI a nuk do ta ndjente veten më komode që të drejtonte të paktën ato pesë ministri, të cilat vënë në zbatim pikën e fortë të fushatës së saj elektorale?
Për ne më e rëndësishmja është çështja e programit . Së dyti, është që qeveria të ketë sukses në të gjitha fushat e sidomos në ato fusha që kanë qenë prioritetet tona kryesore por që janë edhe prioritete edhe të Partisë Socialiste apo të partive të tjera të koalicionit. Njëkohësisht ne nuk e konceptojmë qeverinë të ndarë sipas përfaqësimit partiak, pavarësisht se është e rëndësishme për të pasur një qeveri sa më përfaqësuese dhe nga ana politike. Për ne e rëndësishme është programi të jetë pikërisht sa më realist, sa më tokësor, sa më i zbatueshëm, sa më konkret dhe ne të gjithë do të monitorojmë përmbushjen e këtij programi. Kjo është kryesorja.
A ishte kaq naiv Vangjel Tavo kur tha se Lëvizja Socialiste për Integrim do të duhet të kontrollojë 40 për qind të qeverisjes, sepse dinte edhe shifrat që do të merrte LSI-a? Ju thatë se keni folur për to dy muaj përpara, apo jo?
Nuk e kam dëgjuar këtë deklaratë të z. Tavo por e theksova edhe njëherë tjetër, për ne është e rëndësishme në radhë të parë të zbatojmë programin dhe të realizojmë premtimet tona, sepse kjo është më e rëndësishme për të gjithë qytetarët shqiptarë dhe natyrisht emrat përfaqësues të jenë në harmoni të plotë me prioritetet që ne kemi.
Si ratë dakord me Edi Ramën për të ndarë postin e kryeministrit dhe që ju do të jeni kryetari i Kuvendit nesër, a ishte e thjeshtë?
Mendoj se është një ndarje e natyrshme dhe e logjikshme duke lexuar rezultatin e votuesve dhe përgjegjësitë që ata na kanë besuar. Kështu që unë mendoj se, përderisa Partia Socialiste ka dalë në mënyrë të qartë forcë e parë politike, natyrisht që është akoma më e vështirë për partinë që ka dalë e dyta edhe pse me shumë numra që të pretendojë postin e kryeministrit. Për respekt në radhë të parë të votës së qytetarëve dhe të gjithë opozitarëve i takon PS-së për të marrë përgjegjësinë për drejtimin e qeverisë. Asaj i takonte marrja e kësaj përgjegjësie. Përderisa ata u votuan më shumë se kushdo tjetër sigurisht që u takon atyre kjo përgjegjësi. Natyrisht që edhe unë, në emër të LSI-së, kam marrë një përgjegjësi tjetër shumë të rëndësishme sikurse është drejtimi i Kuvendit. Besoj se fryma jonë e bashkëpunimit, e forcimit të institucioneve dhe e dialogut për reformat e mëdha që ka nevojë vendi do të reflektohet edhe në drejtimin e Kuvendit.
Z. Meta analistët dhe gazetarët janë skeptikë për marrëdhënien tuaj me z. Rama. Z. Rama ka deklaruar se PS dhe LSI mund të bëjnë histori në këtë vend. Do të bëni histori pozitive apo histori për një ndarje të fortë përgjatë qeverisjes?
Besoj se ju do të zhgënjeheni. Ne mendojmë të fillojmë një histori të re pa fshirë historinë e deritanishme tonën, e të gjithë politikës shqiptare dhe të gjithë vendit. Një histori
të re që ndërtohet mbi përgjegjshmërinë, bashkëpunimin, konsensusin, gjithëpërfshirjen. Një histori me të gjithë qytetarët e Shqipërisë.
Kush do ta paguajë faturën e keqqeverisjes. Kush do ta mbajë peshën specifike të katër viteve të para, të mandatit tuaj të parë?
Natyrisht që nuk duhet ta fillojmë kështu. Ne duhet ta fillojmë me vullnetin për mirëqeverisje, duke nxjerrë mësime nga qeverisjet e deritanishme, nga gabimet tona por edhe nga gabimet e aktorëve të tjerë. Besoj se garancia më e madhe është ndërtimi i një qeverisjeje e cila në themel të saj ka transparencën me qytetarin, votuesit, taksapaguesit dhe me të gjithë institucionet e tjera dhe e cila ka në filozofinë e saj bashkëpunimin dhe gjithëpërfshirjen. Pra një qeverisje ku vendimet nuk janë pronë as të Kryeministrit, as të ministrave dhe as thjesht të mazhorancës por ato reflektojnë mendimin më të kualifikuar por edhe sensibilitetet e gjithë shoqërisë dhe të grupeve të interesit në bazë të çështjeve të caktuara.
A keni ju besim se z. Rama si Kryeministër do të jetë jo vetëm administrator i mirë por edhe politikan i mirë?
Unë mendoj se nuk duhet të paragjykojmë. Të gjithë kanë të drejtë të mbeten dyshues për aq kohë sa ata kanë dyshime por të gjithë duhet të jemi mbështetës të kësaj mazhorance të re, të kësaj qeverisjeje të re pasi kjo është një mazharancë e cila i kalon kufijtë e votuesve tradicionalë të të gjitha partive tona. Shoqëria ka sjellë një konsensus shumë më të gjerë në mbështetje të kësaj filozofie dhe të kësaj fryme të re bashkëpunimi në politikën shqiptare. Ajo që unë besoj më shumë është filozofia e bashkëpunimit, e gjithëpërfshirjes dhe transparenca. Përderisa z. Rama është i angazhuar dhe e reflekton këtë frymë edhe pas fitores akoma edhe më shumë nuk ka asnjë arsye pse në të mos besojmë dhe të punojmë të gjithë së bashku që këto objektiva kryesore që kemi afirmuar të bëhen një realitet sepse kjo do të jetë në të mirë të të gjithë qytetarëve shqiptarë.
A ju duket “tokësor” programi i PS-së. Shumica e ekspertëve janë dyshues. Ku do të ndërhyni ju dhe çfarë duhet të zhbëhet në një program të vetëm?
Nuk dua të në çështje më konkrete përderisa ekspertët po merren konkretisht me transformimin e programit elektoral në një program qeverisës. E para gjë që duhet bërë dhe që do të bëhet është transparenca për situatën financiare e buxhetore në të cilën ndodhet vendi. Natyrisht që do të ketë nevojë për një periudhë stabilizimi të financave publike, të borxhit, shlyerja e detyrimeve ndaj firmave për punët e papaguara, për punët publike e kështu me radhë. Se sa do të jetë kjo periudhë stabilizimi kjo do të varet nga gjenda konkrete sepse nuk ka pasur një transparencë të plotë dhe të qartë deri tani. Çdo gjë do të bëhet publike në mënyrë që qytetarët të jenë të qartë dhe të ndërgjegjshëm për situatën në të cilën ndodhemi. Natyrisht që edhe programi do të jetë shumë i qartë për të gjithë objektivat e tij dhe njëkohësisht i ndarë në periudha, si 100 ditë, 200 ditë, 300 ditë deri në 4 vite. Natyrisht që programi ka disa objektiva afatshkurtra, afatmesme etj. Ajo që unë dua të them është që qëllimet e PS-së kanë qenë të mira në të gjitha prioritet që ajo ka theksuar më shumë gjatë fushatës. Natyrisht që tani vjen momenti i transformimit të programit elektoral në një program konkret qeverisës mbi ato parametra mbi të cilat do të merret qeverisja në fillim të shtatorit. Çdo gjë do të jetë transparente.
Legalizim falas ishte çështja më e fortë me të cilën Partia Socialiste u prezantua në këtë fushatë. Çfarë do të thotë legalizim falas?
Nuk mendoj se suksesi i Partisë Socialiste në këto zgjedhje ka ardhur për shkak se ka premtuar legalizime falas. Një pjesë e mirë e dështimit në Partinë Demokratike ka ardhur sepse ka premtuar në 4-5 fushata legalizim falas, dhe ky proces ishte komplet i dështuar. Pastaj, se si do të zgjidhet kjo çështje dhe kur do të zgjidhet, kjo do të bëhet transparente, por që çështja e legalizimit do të marrë një zgjidhje të shpejtë, kjo është e padiskutueshme.
Po për sa i përket heqjes së taksës për biznesin e vogël?
Është një qëllim pozitiv, duhet parë se si mund të implementohet konkretisht. Është një çështje që do të shikohet me imtësi nga ekspertët, për efektin dhe për rolin e saj. Si qëllim ka qenë qëllim i mirë për të ndihmuar biznesin e vogël.
A keni një përqasje të plotë të të gjitha pikave të programit të Partisë Socialiste?
Unë nuk kam qenë shumë i përqendruar më thënë të drejtën tek programi i Partisë Socialiste. Unë kam qenë i përqendruar tek prioritetet e Lëvizjes Socialiste për Integrim, që është punësimi dhe mënyra se si do të rritet punësimi. E para është ristrukturimi i ekonomisë, sepse pa ristrukturuar ekonominë, pa e bërë atë të qëndrueshme, pa rritur ekonominë në vend, në të gjitha fushat, sidomos në fushën e bujqësisë, të agropërpunimit, e kështu me radhë, pa ulur importet, pa rritur eksportet, nuk ka rritje ekonomike të qëndrueshme, nuk ka as punësim të qëndrueshëm. Nuk ka as mundësi dhe as të ardhura për politika sociale që ndryshojnë ndjeshëm shërbimin ndaj qytetarëve. Këto kanë qenë prioritet tona dhe në mënyrë të veçantë për punësimin, për fushat se ku mund të rritet punësimi dhe si do të rritet punësimi.
Ju flisni për 120 mijë të punësuar pak a shumë ndërsa PS flet për 300 mijë të punësuar. Është më i realizueshëm objektivi që ju ofroni, pasi keni dhe një plan më të detajuar sesi do ta realizoni?
Këtë do ta shikojmë në mënyrë më konkrete. Ndoshta ne kemi qenë më modest se ç’duhet. Se objektivi i PS është më ambicioz nuk ka asgjë të keqe. E rëndësishme është që qytetarët shqiptarë të shikojnë që qeveria e ardhshme lufton çdo ditë për të ruajtur çdo vend pune, dhe lufton çdo ditë për të shtuar një vend pune. Në momentin që ata do binden se po bëhet më e mira për këtë qëllim, absolutisht që nuk do të jetë kjo çështja punësohen 300 mijë, apo 310 mijë, apo 270 mijë. Më e rëndësishme është që ata të kuptojnë që përkrah tyre është një qeveri që mendon për çdo vend pune.
Si do të funksionojë bashkia e drejtuar nga demokratët?
Qëllimi ynë është bashkëpunimi në gjithë jetën politike të
vendit. Bashkëpunimi me Presidentin e Republikës pavarësisht se është propozuar nga demokratët me gjithë institucionet e tjera. Bashkëpunim me guvernatorin e bankës sepse është një institucion shumë i rëndësishëm për të vijuar të gjitha reformat ekonomike, financiare, e kështu me radhë. Me sistemin e drejtësisë dhe padyshim dhe me pushtetin lokal pa dallim partiak. Kështu që çdo gjë do të bëhet në interesin e një produkti sa më të mirë për qytetarët, aty ku përgjegjësitë janë të përbashkëta.
A do ketë ndonjë përpjekje nga ana e mazhorancës që pritet shumë shpejt të formojë qeverinë për të vënë balancat e humbura gjatë qeverisjes së demokratëve? Do ketë përpjekje qoftë në ndryshimin e kushtetutës?
Nuk duhet të nisim me paragjykime. Ne gjithçka do ta bëjmë bazuar mbi transparencën dhe mbi bashkëpunimin.
Do ketë një lëvizje?
Nuk do të ketë asnjë lëvizje të sforcuar aty ku institucionet funksionojnë në bazë të ligjit.
Cilat institucione nuk funksionojnë në bazë të ligjit?
Nuk mund ta them këtë gjë sepse vetëm kur je në pozicion apo detyrë zyrtare mund të bësh një verifikim të qartë. Është shkelur apo nuk është shkelur ligji. Ligjet janë të qarta.
Duke qenë se nuk i keni pranuar asnjëherë ndryshimet kushtetuese do të bëni një hap drejt ndryshimit të atyre neneve të Kushtetutës duke qenë se kësaj radhe keni një mazhorancë solide?
Së pari, ka disa elementë. Ne dëshirojmë bashkëpunimin në të gjitha fushat, sidomos për sa i takon reformave të mëdha, aq më tepër legjislacionit që ka të bëjë me integrimin në Bashkimin Evropian. Natyrisht që ne kemi një mazhorancë prej 84 deputetësh dhe ajo mund të jetë edhe më e lartë në të ardhmen. Po kjo nuk është më e rëndësishmja. Më e rëndësishmja është vullneti ynë për të bashkëpunuar dhe për të orientuar konsensusin me opozitën për miratimin e reformave të mëdha që i shërbejnë të gjithë vendit dhe që kanë impakt afatgjatë. Ndryshimet në Kushtetutë nuk i kam pranuar dhe nuk do t’i pranoj asnjëherë, por natyrisht që rikthimi i Kushtetutës në themelet e saj varet shumë edhe nga konsensusi me opozitën e re.
Do ta kërkoni këtë gjë?
E kemi kërkuar dhe do ta kërkojmë gjithmonë. Unë këtë e kam kërkuar edhe në vitin 2009, por në atë kohë z. Berisha më ka thënë në mënyrë të qartë që “unë për këtë gjë nuk jam dakord, se unë kam qenë dakord me këto ndryshime që janë bërë.” Nuk mjafton vetëm bashkëpunimi me z. Rama për këtë gjë. Duhet edhe konsensusi me opozitën për ndryshimet kushtetuese.
Ku duhet të preket Kushtetuta dhe më pas të kërkoni një proces bashkëpunimi me opozitën ?
Kushtetuta duhet të preket në të gjitha pikat të cilat u ndryshuan dhe të kthehet aty ku ishte.
Si kryetar i ardhshëm i Kuvendit do të duhet të menaxhoni edhe marrëdhëniet me opozitën. Do të jetë më e thjeshtë marrëdhënia me opozitën pa Berishën kryetar të PD-së?
Nuk kam asnjë paragjykim për opozitën as për emrat e veçantë sepse nuk është detyra ime as të përzgjedh, as të paragjykoj përfaqësuesit legjitimë të saj. Për mua në rast se Kuvendi do të më japë mbështetjen për ta drejtuar atë gjatë katër viteve të ardhshme, do të bëj çdo gjë që Parlamenti të jetë vërtet një shembull i konstruktivitetit, i bashkëpunimit, i respektimit të ligjeve, i respektimit të rregullores dhe të mënyrës së funksionimit. Të jetë një model transparence dhe të sjellë mesazhe pozitive në mbarë shoqërinë dhe për qytetarët tanë. Do të bëj çdo gjë që të evitohet apo minimizohet fryma e konflikteve të panevojshme të cilat nuk sjellin asnjë gjë pozitive për asnjë faktor politik dhe aq më tepër që helmojnë shoqërinë tonë në mënyrë të padrejtë sepse mendoj se jemi në një stad të ri dhe ky stad i ri kërkon një Parlament me një performancë të re, me një frymë tjetër që i përgjigjet atij standardi evropian, që vendosën qytetarët shqiptarë me pjesëmarrjen e tyre të lartë dhe mjaft të kulturuar në zgjedhjet e 23 qershorit.
Kryetarja e vëzhguesve ndërkombëtarë ishte e shqetësuar kur thoshte se është pak e dyshimtë sesi do të certifikohet rezultati duke pasur parasysh situatën në KQZ. Ju shqetëson ky fakt?
Asnjëherë nuk më ka shqetësuar ky fakt. E kam theksuar që më parë dhe vetë kryetares së misionit të ODIHR-it, kur ka ardhur përpara një muaji në një takim me të. E kam bërë të qartë se ajo që ka ndodhur në KQZ nuk është gjë e mirë dhe ka krijuar dyshime për standardin e zgjedhjeve. Megjithatë, kam thënë se nuk do të ketë probleme sepse opozita do të marrë pjesë në gjithë procesin e administrimit zgjedhor, do të bëjë detyrën e saj në mënyrë shembullore, do të garantojë integritetin e këtij procesi dhe njëkohësisht diferenca do të jetë kaq e thellë sa nuk do të ketë nevojë për një rol të KQZ. Pra, roli i KQZ është një rol fare formal. Rezultatin e kanë certifikuar 1 milionë qytetarë shqiptarë që kanë votuar për opozitën.
A do të jetë KQZ-ja në tryezën e diskutimeve tuaja të mazhorancës së nesërme me opozitën riformatimi si tezë e shumëpërfolur ?
Nuk kam pasur kohë të mendoj për këtë gjë. Ndoshta do të kemi pas shtatorit.